رواية كاملة

ولا عمري كنت عبيطة عشان أبلع الكلام ده يا ماما. الكلام كان عليا بالاسم وبالصفة، ولو هما شايفين إن خدمتي ليهم پهدلة وقرف، يبقى مفيش واحدة فيهم تستاهل حتى إني أمد إيدي أسلم عليها، ولا هسمح لنفسي أنزل أكون مادة للتريقة والضحك الرخيص بتاعهم.
حماتي حسيت إن مفيش فايدة من الكلام معايا، ونبرة صوتها اتحولت للحدة يعني إيه يا نورهان؟ هتفضلي متسمرة هنا؟! وجوزك لما يرجع من الشغل ويلاقي مراته قاطعة مع أهل عروسة أخوه من أول يوم، تفتكري هيقولك برافو عليكي؟! إنتي كده بتعملي مشكلة في البيت من أولها والعروسة لسه مدخلتش!
بصيت لها وابتسمت ابتسامة تقهر
جوزي لما يرجع، هقوله الحقيقة كلمة بكلمة، ومحمود راجل ودمه حر وعمره ما هيرضى لمراته تتهان وهي بتخدم أهله.. والعروسة وأهلها لو هما داخلين بالمنطق ده واللسان ده، يبقى هما اللي بدأوا المشكلة مش أنا.. أنا عملت اللي يرضي ضميري وديني وأصلي وقدام ربنا أنا مأثرتش، لكن كرامتي مش هتداس عليها عشان عزال ولا عشان فرح.
حماتي نفخت بضيق، وضړبت كف على كف وهي بتبرطم لا حول ولا قوة إلا بالله.. شيطان ودخل وسطينا، والله العظيم البيت ده ما بيهدى أبداً! ولفت ضهرها ونزلت وهي بتدبدب على السلم من الغيظ.
فضلت واقفة مكاني في الصالة، قلبي بيدق بسرعة، بس حسيت براحة غريبة.. راحة إني مطلعتش هبلة وكملت تمثيل الضحكة الصفرا وأنا عارفة هما بيقولوا عليا إيه من ورا ضهري.
شوية وسمعت صوت باب العمارة بيفتح ويقفل، ودوشة أهل العروسة وهما بيلموا حاجتهم عشان يمشوا بعد ما خلصوا فرش. كنت سامعة صوت ضحكاتهم العالية في مدخل العمارة وصوت كعوب جزمهم، وكان واضح إن الجو تحت متكهرب ومكتوم، ومفيش غير مجاملات باردة.
وقفت ورا شباك الصالة الموارب اللي بيبص على الشارع، وشوفتهم وهما خارجين يركبوا العربيات.. أم العروسة كانت بتبص على بلكونة شقتي بنظرات لؤم وتفحص، وعمتها ماسكة شنطتها وبتتكلم مع واحدة تانية وهي بتبص لفوق كأنهم حاسين إن في حاجة اتكشفت.
وفجأة، سمعت صوت مفتاح بيتحط في باب شقتي.. الباب اتفتح، ودخل جوزي محمود، كان راجع من شغله باين عليه الإرهاق، بس وشه كان مشدود وعينيه فيها نظرة استغراب وڠضب مكتوم، أول ما شافني واقفة بالشياكة دي كلها وفي نص الصالة، وقف مكانه وقفل الباب وراه وقال بصوت واطي ومريب
نورهان.. هو إيه اللي حصل تحت مع أهل عروسة أحمد بالظبط؟!
يتبع
حكايات مني السيد حصري ٢ 
فضلت واقفة مكاني في نص الصالة، عيني في عين محمود، ونبضات قلبي اللي كانت سريعة هديت فجأة وبقت منتظمة ببرود غريب. الباب اتقفل وراه برزعة مكتومة، ومحمود فضل باصصلي من فوق لتحت بنظرة فيها خليط من الحيرة والغيظ، مفاتيحه بترن في إيده وهو بيحطها على الترابيزة الصغيرة جنب الباب.
أنا بسألك يا نورهان.. إيه اللي حصل تحت؟ صوته كان واطي بس فيه نبرة التحقيق اللي بتطلع لما يكون سامع كلام شاحن دماغه، أنا داخل العمارة، لقيت أحمد أخويا قاعد على السلم وشه أصفر زي الليمونة، وأمي جوة عمالة تلطم في الصالة وتقولي مراتك خربت اليوم وكسرت بخاطر العريس قدام نسايبه! أنتي لابسة ومروقة نفسك كده وسايبة البيت يغلي ليه؟!
أخدت نفس طويل، وقربت منه خطوتين بكل هدوء، شيلت من إيده شنطة شغله، وحطيتها على الكنبة، وبصيت له بنظرة ثابتة مفيهاش ذرة خوف ولا تردد.
حمد الله على سلامتك الأول يا أبو هنا.. ادخل اغسل وشك، وخد نفسك، وتعالى اقعد قدامي واسمع مني أنا اللي حصل، وبعدين احكم باللي يرضي ربنا.. مش إنت دايماً بتقول إن الراجل مبيحكمش بودنه من طرف واحد؟
محمود اتنفس پغضب مكتوم، ودعك وشه بإيده الاتنين وهو بينفخ، ومشي دخل الحمام، سمعت صوت المية وهي نازلة، وأنا رحت على المطبخ، صبيت له كباية مية ساقعة من التلاجة ورجعت قعدت في الصالة مستنياه.
خرج من الحمام منشف وشه بالفوطة، قعد على الكرسي اللي قدامي، حط كوعه على ركبته وبصلي وقال بجمود اديني قعدت يا ستي، وسامعك.. إيه الحكاية؟ أمي بتقول إنك بعد ما طبختي وعملتي الأكل، اتقمصتي فجأة ورفضتي تنزلي تضايفي الناس، وسبتي العريس هو اللي يشيل الصواني وينزلها، وأهل البنت استغربوا وحسوا إنهم مش مرحب بيهم ونزلوا من الشقة واخدين على خاطرهم.. الكلام ده حصل؟
مديت له كباية المية، أخدها وشربها دفعة واحدة، حط الكباية على التربيزة، وبدأت أتكلم، وصوتي كان هادي ورزين، بس كل حرف طالع منه كان محمل بمرارة اليوم كله.
يا محمود، أنا من الساعة تمانية الصبح وأنا في معركة.. أمك كانت عايزة تضايف الناس بفسيخ وعيش وسلطة، وأنا اللي قولت عيب وحرام، دي ناس جاية بشنطها وبناتها عشان يفرشوا شقة ابنك، مينفعش نطلعهم شامين ريحة زفارة ولا يقولوا أهل العريس مستخسرين فينا لقمة عدلة.. أخدت الفلوس من أحمد ونزلت اشتريت بيبسي وعملت عصاير مانجا وفراولة بجهدي ومن جيبي، وجبت تتبيلتي وخضاري وحاجتي، وقفت قدام البوتاجاز والفرن لما ضهري انحنى، طبخت ست فرخات وصواني مكرونة بالبشاميل وصواني جلاش باللحمة المفرومة، وعملت سيرفيس فنادق يشرف عيلتكم كلها.. الكلام ده فيه غلط؟
محمود بصلي بتردد، وهز راسه وقال لأ، مفيش غلط، ده كتر خيرك وأحمد نفسه قالي كده قبل ما يتكلم في أي حاجة.. بس الباقي بقى؟ الباقي اللي زعل أمي وقلب الدنيا؟
ابتسمت بۏجع وقلت الباقي يا محمود، إني بعد ما خلصت وغرفت وطلعت الصواني بنفسي لأحمد عشان ياخدوها، قولت أدخل أعمل براد شاي تقيل بنعناع زي ما بنعمل في الأصول.. وأنا نازلة بالصينية على السلم بين الدورين، باب الشقة بتاع أحمد كان موارب.. سمعت مين جوة؟ سمعت عمة العروسة بتوشوش أمها بصوت عالي ومليان مسخرة وبتقولها شفتي سلفتها وهي طالعة بالأكل؟ إيه ده، هي طالعة لنا مبهدلة في نفسها كده ليه؟! ولا ريحتها.. دي معفنة بصل وزفارة فراخ، كانت غيرت هدومها حتى بدل ما تفرسنا بمنظرها ده!.
محمود برّق
بعينيه، وضهره اتفرد فجأة على الكرسي، ملامح وشه اتغيرت وبدأ يعقد حواجبه پغضب، بس قبل ما ينطق كملت كلامي وصوتي بيعلى بنبرة حاړقة استنى يا محمود مخلصتش.. كملت أم العروسة وضحكت بكركرة سمعتها لحد السلم، وقالت لعمتها خلاص يا أختي، اعتبري هديتها من بنتي في الصباحية إزازة بادي سبلاش وبرفيوم ومزيل عرق نستر بيها ريحتها!.. هما الاتنين ماتوا على روحهم من الضحك عليا، وأنا واقفة على السلم ماسكة البراد المغلي في إيدي!
محمود وشه اسودّ من الغيظ، عروق رقبته نفرت، وقام وقف على حيله من كتر الانفعال، وقال بصوت جهوري هما قالوا كده؟! في بيتنا وعلى أكل إيدك يقولوا عليكي معفنة ومبهدلة؟!
أيوة يا محمود، قالوا كده بالظبط، وأنا سمعت بودني دي اللي هياكلها الدود.. لفيت بضهري، وطلعت شقتي، دخلت استحميت ونضفت نفسي اللي شايفينها معفنة، ولبست أنضف ما عندي، وحطيت البرفيوم اللي شرياه بفلوسك ومن خيرك، وقعدت في بيتي.. ولما أحمد خبط قولتله ادخل شيل صينية الشاي لضيوفك، ولما أمك طلعت تزعق وتقولي إنتي قالعة المريلة ليه وقاعدة شياكة وسايبة الناس، قولت لها الحقيقة كلمة بكلمة.. عارف أمك ردت عليا قالت إيه؟
محمود بصلي وهو بيمسح على شعره پغضب وسأل قالت إيه؟
قالتلي كبري عقلك وعديها، وتلاقيكي سمعتي غلط، وبلاش تعملي مشاكل للواد في أول جوازه.. يعني أنا اللي متبهدلة في المطبخ عشان أشرفهم أطلع مبهدلة ومعفنة، ولما أصون كرامتي وأقعد في شقتي أطلع أنا النكدية وخړابة البيوت؟! قولي إنت يا محمود، يرضيك أنزل أصب الشاي للستات دول وأوزع عليهم الابتسامات وهما لسه دايسين على كرامة مراتك بالجزمة؟! ترضاها لمراتك؟!
محمود فضل رايح جاي في الصالة بخطوات سريعة وعڼيفة، الڠضب كان واكل وشه، وهو راجل صعيدي في أصله وميرضاش أبداً بقلة القيمة، بس في نفس الوقت أحمد أخوه الصغير اللي بيعتبره زي ابنه وفرحه كمان أسبوعين.
وقف قدامي وبص في عيني، ومسك إيدي اللي كانت لسه ملسوعة من الفرن، وضغط عليها بحنية وحزم وقال حقك عليا أنا يا نورهان.. وراسك دي فوق راسي، والنعمة الشريفة ما يرضيني ولا هسمح لكلبة فيهم تتنفس عليكي بنص كلمة، وكرامتك أنتي خط أحمر عندي من يوم ما ډخلتي البيت ده!
الكلمة نزلت على قلبي بردت الڼار اللي كانت مولعة فيه، ارتحت لما لقيته واقف في صفي ومش مايع زي باقي الرجالة اللي بتبيع حريمها عشان خاطر كلمة عديها.
سحب نفس عميق وقال بس استني عليا.. أنا مش هنزل أعمل شوشرة تكسر أحمد في يوم زي ده، أنا هنزل أشوف أمي الأول وأعرف هي مخبية عني إيه وبتغير الكلام ليه، وعليا النعمة لو طلع الكلام ده حقيقي زي ما بتقولي وأنا مصدقك في كل حرف لأعرفهم مقامهم كويس أوي.
محمود لف وفتح الباب، ونزل السلم خطوتين بخطوتين، وصوت خطواته التقيلة كان بيهز العمارة. أنا وقفت على باب الشقة أسمع اللي بيحصل تحت، لأن الأمور كانت خلاص وصلت لنقطة مفيهاش رجوع.
سمعت باب شقة حماتي بيتفتح ويترزع، وصوت محمود العالي شق هدوء البيت أحمد! يا أحمد تعالى هنا! وأنتي يا أمي، تعالي فضوها بقى واقعدوا وقولولي الحكاية بالظبط!
نزلت كم خطوة على السلم بهدوء ووقفت أسمع.
حماتي صوتها طلع باكي ومسكين، النبرة اللي دايماً بتستعملها لما تحس إنها في ورطة يا محمود، في إيه يا بني داخل زي القضاء المستعجل كده؟! وطي صوتك الجيران تسمعنا، إحنا لسه مخلصين العزال على خير والناس نزلت مبسوطة، مالك داخل مشعلل
ليه؟!
محمود رد بزعيق مين اللي نزل مبسوط يا أمي؟! الناس اللي قعدوا في شقة ابني يتريقوا على مراتي ويقولوا عليها معفنة وريحتها بصل وزفارة فراخ؟! أنتي كنتي عارفة الكلام ده وسكتي عليه وجاية فوق تلومي نورهان وتطلعيها هي اللي غلطانة؟!
الصالة تحت سكتت خالص، وصوت أحمد طلع متوتر ومړعوپ يا محمود استهدى بالله بس، مين اللي قال الكلام ده؟! نورهان قالتلك كده؟
محمود رد عليه بحسم أيوة قالتلي، ونورهان مش كدابة، ومفيش واحدة هتخترع كلام بالۏساخة دي من دماغها! أنتوا كنتوا سامعين الكلام ده ولا لأ يا أحمد؟ انطق!
أحمد سكت، وسكوته كان أكبر اعتراف، وبعد ثواني سمعت صوته وهو بيتحشرج بالغيظ والكسوف بص يا محمود.. أنا.. أنا مكنتش سامع في الأول، بس لما دخلت المطبخ اللي في شقتي أجيب مية، سمعت حماتي وعمتها قاعدين في البلكونة بيهمسوا وبيضحكوا.. سمعت طراطيش كلام عن الريحة والبصل، بس قولت يا واد كبر مخك ومتبوظش اليوم، دول ناس كبار وبيهزروا، وبعدين نورهان فوق راسي وأنا مقبلش عليها كلمة، بس مكنتش عايز